Desaparición

Jutka está intentando deixar ao seu mozo maltratador cando coñece a un mozo do que namora nunha festa universitaria. Avergoñada da súa condición de obreira, minte e di que ela tamén é estudante. Esta mentira marca a súa relación. Cando lle revela a verdade, o rapaz decide seguir adiante coa mascarada para manter as aparencias ante a súa familia e amigos, de clase intelectual e acomodada. O ambiente comeza a enrarecerse e tensarse cada vez máis.

Mészáros xa realizara un documental sobre tecedoras, A lőrinci fonóban (At The Lőrinc Spinnery, 1971), cando se decidiu a rodar Desaparición. Aquí, a actriz Erzsébet Kútvölgyi mestúrase entre verdadeiras obreiras para ofrecer un realista retrato das súas condicións de traballo. Antes de abandonar a fábrica, adoita darse unha ducha, acto que a realizadora capta de forma sensual e empoderada. É un momento de calma e paz ante as tensións psicolóxicas e físicas que veñen despois. A dramaturxia céntrase na imposibilidade de integración das clases, resultando irónico que os que mandan nun estado soviético sexan acomodados burgueses.